يقدم لكم اليوم الدكتور مايكل سامي عبد الله طبيب الأطفال المشهور بسوهاج تحذير شديد اللهجة بخصوص من الروتا فيروس ،، يضرب بقوة الآن احذروا .. الي كل الامهات ... شاهدي التحذير وشاركي كل اصدقائك
لمشاهدة المزيد من هنا
أرسلت أكثر من صديقة رسائل كثيرة تستفسر عن حالة مفاجأة لأطفالها نعرض بعضا منها :
- دكتور ،ابنى عمال يسهل ويرجع بقاله كذا يوم،، وملهوف عالمياه وكل اما اديله حاجة يرجعها ..شكوى متكررة بنسبة ٩٩٪ ،،انا تقريبا الأيام اللى فاتت دى قاعد فالعيادة بس استقبل حالات الاسهال والترجيع حاجة بجد صعبة جداااااااااا ،،، اسهال رهيب مش بيقف ،،، ترجيع جامد،،، جفاف ،،، محتاج محاليل ،،، والأغلب حالات محتاجة تتحجز فى مستشفى،،، أطفال تخف وترجع تتعب تانى ..؟؟؟؟؟؟؟
حكاية الروتا
- حكاية بقى(Rotavirus) وده بيتوصى بالعيال أوووووى ،، اسهال شديد ١٠:٥ مرات يوميا وبيطول ممكن لأكتر من أسبوع وممكن يحتاج محاليل وريدية،، وقد يسبب وفاة لاقدر الله.
- والله أم اتصلت عليّ من يومين بتقولي ابني عمل فوق ال ال40 مرّة وييجي 10 مرات ترجيع ، معقوووووووووووووووووررررررل ، اه معقوووووووول
إنّه الرووووووتا فيروس الرهيب ,,خلّوا بالكوااااا ده شغّال وبقوة اليومين دول ده الموسم بتاعه الشتاء ، غالباً طفلك هيحتاج محاليل ، لإنّه شغّال إسهال وترجيع مش بيقف وفالأغلب هيحصل جفاف ، ربنا يستر علي أولادنا كلنا ، اللي لسّه طفله صغير لازم يروح يطعّمه تطعيم الروتا فيروس فالمصل واللقاح هيحميه كتير اووووي.
- انشروا البوست للفايدة وحذّروا كل اللي تعرفوه
- ايه فيروس الروتا ده???
-- فيروس الروتا وهو السبب الرئيسي للإسهال الشديد والقئ عند الرضع والأطفال الصغار في جميع أنحاء العالم، بل إنه العامل الرئيسي في وفاة أكثر من نصف مليون طفل سنويًا بين الأطفال الذين تقل أعمارهم عن 5 سنوات ، اسهال وقئ شديد يصل لعشرات المرّات من الإسهال والقئ ، خاصة الأطفال فالحضانة ، واكتر وقت بييجي فيه هو الشتاااااااااء.
- إيه اعراض المرض ده??
- تظهر الأعراض بعد اليوم الثالث أو الرابع من الإصابة بالفيروس، وتكون على هيئة: إسهال ميّه خالص يوصل ممكن ل 20-30 مره فاليوم واكتر مع الترجيع المتواصل لمدة من 3 إلى 8 أيام.
- آلام شديدة وحادة في البطن.
- ارتفاع درجة حرارة الجسم إلى 39.5 أو أكثر
- وجود دم في براز الطفل.
- نقص وزت الطفل خلال 12 ساعة أكثر من 10% من وزنه
- ظهور أعراض الجفاف على الطفل "جفاف الفم والبكاء دون دموع والإحساس بالنعاس وبرودة الجلد وجفافه والعطش الشديد وعدم التفاعل".
- إزّاي بيتنقل الفيروس ده ?
-- الأطفال اللي فالحضانة خاصة --
- يصيب الفيروس الأمعاء ويخرج في البراز وينتقل في معظم الأحيان من اليد إلى الفم، من خلال وضع الطفل يده في فمه بعد لمس شيء ما ملوّث بالفيروس.
- ويحدث ذلك لدى الأطفال الذين لا يغسلون أيديهم، خصوصًا قبل الأكل وبعد دخول الحمام.
- كما يمكن أن تنقله الأم أو أي شخص يهتم بالطفل في أثناء تحضير الطعام أو بعد تغيير الحفاضات.
- ويمكن حدوث الإصابة بتناول مياه أو طعام ملوّث بالفيروس.
- ينتقل أيضًا من خلال تناقل الألعاب من طفل مصاب إلى طفل تاني سليم.
- الفيروس ده مش بيموت بسهولو حتى مع استخدام المعقمات وغيرها نظرًا لمناعته القوية.
- تعتبر الأم من أكثر الأشخاص عرضة للإصابة بعدوى الفيروس بنسبة تصل إلى 95%، بانتقاله في حالة عدم غسل اليدين جيدًا بعد تنظيف طفلها المُصاب.
- إيه طرق الوقاية منه يا دكتور? هااام جدا
- الفيروس ده بينزل فى براز الأطفال المصابين ويتنقل لأطفال آخرين بتلوث الميه بيهم او تلوث الفواكه بيهم،،، او مباشرة من طفل لطفل مش بينضف نفسه كويس بعد التبرز.
- يبقى عن طريق الأكل والشرب الملوث بالميكروبات دى،، الأيس كريم ،، البطيخ .
عشان كده ...........
- أهم حاجة التطعيم ضد الروتا فيروس بيدي فعلاً وقاية منه. ( التطعيم نهاية البوست ).
- الحضانة ، خلّو بالكو من ولادكم اللي فالحضانة ، او قعّدوهم منها بأجازة اليومين دول ، بتهرّج يا دكتور ?? والله أبداً اليومين دول صعبين خالص.
- لازم نقلل من الأكل اللى من بره خالص.
- لازم تنضفى طفلك كويس بعد الحمام وتغسلى ايده كويس بالصابوون او الديتول (الديتول مش قصة كله يجيب ديتول).
- لازم تتخلصى من البامبرز فى اكياس مغلقة وبعيد عن الأطفال.
- تغسلى الأكل والفواكه كويس والخضروات.
- متبقيش اكل لتانى يوم ، اطبخى على قدك انتى وافراد عيلتك عشان الاكل ميستناش لتانى يوم،، احفظى الاكل فى التلاجة،،غطي الاكل كويس،، شوفى حل للذباب.
- طز فى اللبن الصناعى اللى الأمهات بتديه لأولادها عالفاضى والمليان وهو مش محتاجه وبيكون سبب فى النزلات المعوية.
- لازم نستخدم مياه كويسة (فلتر) او نغلى ماء الشرب والأكل.
- مشاكلها ايه ومضاعفاتها؟ يعمل بلاوووى
لو محتاج ... دليل أطباء الاطفال بسوهاج
- الجفاف:
نتيجة فقدان السوايل وبعض الأملاح الهامة للجسم (الصوديوم والبوتاسيوم) وأعراض الجفاف لازم كل الأمهات والأبهات يعرفوها ويحفظوها كويس جدا جدا جداااااااا:
١-ابنك ملهوف ع المياه والرضاعة (كل اما كوباية مياه تعدى ادامه يعيط عايزها) ودى اول سلمة فى الجفاف.
٢-ابنك متوتر ومزاجه وحش اوى.
٣-ابنك عينه داخلة لجوة.
٤-لما تمسكى جلد بطنه تلاقيه يرجع ببطء.(هام جداااا لازم تشوفيها عشان تعرفيها)
٥-ابنك لسانه ناشف مفيهوش لعاب.
٦-ابنك نفوخه الامامى منخفض (مشفوط لجوه).
٧-ابنك بيعيط من غير دموع.
٨-ابنك بوله قل.(حمام البول قليل).
٩-ضربات قلبه سريعة ونفسه سريع.
١٠-ابنك فقد ١٠٪ او اكتر من وزنه.
١١-علامات الجفاف الشديد ( لو متلحقش ممكن لاقدر الله يموت): ابنك نايم مش بيتحرك(مسطح يعنى ) - اضطراب فى الوعى- ابنك بتديله الحقنة مش بيعيط من الشكة - ابنك مش قادر يشرب حتى.. اجرررررى على اقرب مستشفى بالله عليكى مش ع العيادة الخاصة.
-- تشنجات:
و أسبابها فى النزلة المعوية كتير ( بسبب الحرارة - اضطراب املاح الجسم بالعلو او النقصان-التهابات بأغشية المخ<الميكروب طلع من البطن راح المخ ).
--- فشل كلوى:
بسبب نقصان الدم الواصل للكلى.
- طب ايه العلاج؟؟
- فيه ثوابت لازم نعرفها قبل اما نتكلم عالعلاج
- اولا:الترجيع أوحش من الاسهال لانى لو فيه ترجيع فتقريبا كل محاولات العلاج هتفشل لانى الطفل هيرجع محلول الجفاف ودا اهم خطوة فى العلاج وهيرجع دوا السخنية وهيرجع الاكل والشرب والرضاعة وساعتها الطبيب بيبقى خلاص مش قدامه حل الا المحاليل الوريدية ود طبعا بعد محاولات ايقاف الترجيع،،، عشان كدة لو مفيش ترجيع نطمن ان شاء الله هنقدر نعوض الطفل بالمحلول اللى بالفم.
-- ثانيا:الاسهال ده حاجة مينفعش نوقفها (مينفعش نكبسها جوه بطن العيان) فنسيب الاسهال شغال بس بشرط طول الوقت تعويض بمحلول الجفاف بالفم او الوريد،،، وهو هياخد وقته وهيقف لوحده ان شاء الله.
---- ثالثا:مريض النزلة المعوية لو هيتعالج فى عيادة خاصة تقريبا الطبيب لازم يشوفه يوميا عشان يقيم حالته مينفعش يقول للأم روحى وتعاليلى كمان اسبوع👎👎.
---- رابعا:مش كل عيان عنده جفاف لازمله محلول وريدى(يا مدام مفيش حاجة اسمها متعلقله محلول يا ضاكتوووور ،،، مدام الطفل بياخد االمحلول بالفم ومتقبله مش بيرجعه يبقى مفيش محلول بالوريد).
----- خامسا: علاج النزلة المعوية سنس Sense خاصة من الام اللى لازم تشارك فى العلاج متكونش لا مؤاخذة هابلة وعمال تأكله ملوخية وتقولك الاسهال موقفش فيه!!!!!.
----- سادسا: طول مفيه جفاف واضطراب فى املاح الجسم هيفصل الاسهال والترجيع شغال..
--------- سابعا: اى اسهال مطول عن اسبوعين لازمله معامله مختلفة لربما يكون مشاكل فى اللاكتيز انزيم.
- العلااااااااااج ايه؟؟
= محلول الجفاف (أهم شىء): فيه انواع كتيرة منه(هيدروسيف - لو هيدران- ORS) بنحط الكيس منه على ٢٠٠ سم ماء سبق غليها ويعطى بالسرنجة كالآتى :
(١) ١٠٠:٥٠ سم بعد كل مرة اسهال ببطء عشان ميرجعش
(٢)سرنجة ٣سم كل ٣دقايق ومش بالكوباية ابدا،،
(٣) اوعى الطفل يخدعك ويفضل يشرب لانو لو شرب كتير ورا بعض هيرجع عشان كدة واحدة واحدة.
(٤)متشربيش طفلك المحلول بالكوباية ولا بالببرونة عشان ميرجعش
(٥)لو طفلك بيرجع المحلول يبقى توسعى المدة بين كل مرة ومرة يعنى سرنجة ٣سم كل ٥ دقايق بدل كل ٣دقايق.
= فى حالات الترجيع: تجربة دوا شرب فى الاغلب بيفشل زى الموتيليام شراب عشان كدة بندى حقن للترجيع اسمها زوفران- دانست- ايمرست (١/٢: ٣/٤ سم لكل ١٠ كيلو) وبعدها نريح المعدة شوية.
= فالأغلب ادوية الإسهال والمطهّرات المعوية ملهاش دور للأسف.
= شراب الزنك مهم جدااااااا
= ادوية الحرارة لو فيه حرارة وندى السيتال عشان اهدى عالمعدة والاهم هو الكمادات.
= الأكل:
---------الاكل اثناء النزلة ---------
بطاطس مهروسة
بطاطا
شورب خضار ولسان عصفور
مياه الأرز
المكرونة المسلوقة
عصير تفاح بدون سكر
عصير جوافة بدون سكر
حمص مطحون
شاى سكر خفيف +بقسماط
عيش التوست
تفاح مهروس+ موز
جزر مهروس
------- ممنوعات -----
اى حاجة مسكرة
الحاجات الساقعة (السفن)
العصاير الجاهزة
المسبكات
البطيخ
المثلجات
منتجات الألبان
- التطعيم ضد فيروس الروتا
- ده يا جماعة الطريقة الأمثل والفعّالة بنسبة كبيرة جدااااا في منع الإصابة بالفيروس ده ، خاصة لو الطفل سنه صغير ، وتطعيم الطفل مش بس هيفيده هوّ لالالا دا هيفيد اللي حواليه كلهم ، لإنّي بالشكل ده هنحجّم الفيروس ونمنع انتشاره
لاااااااااااااازم نطعم ضد فيروس الروتا علطوووول
-- فيه نوعين من التطعيم --
= النوع الأول "روتاريكس"،
ويُعطي عل جرعتين بداية من سن ٦ أسابيع علي أن تكون الفترة الفاصلة بين الجرعتين شهر علي الأقل ويكون سعر الجرعة 320 جنيه تقريبًا.
= النوع الثاني يسمى "روتاتك"
ويعطي على ٣ جرعات، بداية من سن ٦ أسابيع علي أن تكون الفترة الفاصلة بين كل جرعتين من ٤ إلى ١٠ أسابيع، ويكون سعر الجرعة 270 جنيهًا تقريبًا.
= يحقق النوعان نفس الدرجة من الوقاية تقريبًا، ولكن لا بد من الانتهاء من جرعات أيا من النوعين قبل إتمام الطفل عمر ٣٢ أسبوعًا، وألا يتعدى عمر الطفل عند الجرعة الأولى ١٥ أسبوعًا.
= يتوافر اللقاح في فروع مراكز تطعيمات المصل واللقاح
إرسال تعليق
إرسال تعليق